غالبا ملي كا تسول شي واحد قراي ( لا أُعمم ) بحال هاد السؤال، كا يحاول يتهرب، لأنهُ كا يخاف لا يوريك #السر، و تفوتو فالترتيب، لأننا للأسف تربينا على عقلية #التنافس، بدل عقلية #التعاون، و عقلية #النُدرة، بدل عقلية #الوفرة، و المنظومة التعليمية قتلات فينا روح البارتاج و تقاسم الخبرات و التجارب مع الناس.
بلا مُقدمات، ندوزو للمعقول :
0- نجاوب بالزربة على سؤال : واش بصح لافاك ما فيها ما يدار ؟
الجواب باختصار : النجاح ديالك ما متعلقش بفين كا تقرا، و لكن متعلق بشكون نتا ؟
و هادشي ديجا جاوبنا عليه ففيديوهات و مقالات سابقة.
تقدر تلقا واحد تخرج من لافاك و مشا بعيد فالحياة المهنية ديالو.
فالمُقابل تقدر تلقا واحد تخرج من المدارس العُليا للمُهندسين و ما دارو والو فحياتو.
أو تقدر تلقاه خدام فشركة بتلتالاف درهم بحالو بحال صحاب باك +2 .
و بالتالي باش نحسمو فهاد الموضوع، أهم حاجة، ماشي هي واش تخرجتي من لافاك أو من مدرسة عُليا أُخرى، لي كا يهم هو : #الكفاءة ديالك، و القُدرة ديالك على حل المشاكل
الحالية لي كا يعاني منها سوق الشغل.
أي واحد مشيتي تخدم عندو غا يسولك سؤال واحد، ديما كا نقولو ونعاودو :
" بين ليا أني محتاج ليك، و غا نقبلك بعيني مغمضين "
Montrez à moi que j'ai besoin de toi, je te retient .
ما كا يهمش نوع الشهادة لي حصلتي عليها، و لكن كا يهم نوع الخدمة و الجودة ديالها
لي قادر تقدمها و فأقل وقت ممكن.
و مُستقبلا، غادي تنقارض هاد الثقافة ديال الشاف و المُوظف، و غا تولي بلاصتها
ثقافة " التشارُك " collaboration
و لي المعنى ديالها أنهُ لا المُوظف، و لا المُدير ديالو غا يكونوا في خدمة #الزبون
Le client est un roi.
الملك هو الكليان، و هو لي غا يخدم مُدير الشركة عندو لا هو ولا الموظفين ديالو.
و بالتالي نسا عليا دوك الإشاعات ديال باك صاحبي و " حل المشكل بآلو"
مستقبلا ما غاديش يقبلك شي واحد فالشركة ديالو بسبب المعارف ديالك.
و لا حتى بسبب المعرفة ديالك، و لكن غا يخدمك بمعيار واحد لي هو :
القُدرة ديالك على استخدام ديك المعرفة.
أو بتعبير أدق : ما بقاتش فشحال أو فشنو كا تعرف، و لكن بقات فشنو هوما المشاكل
لي غا تحلهوم بداكشي لي كا تعرف "
و بالتالي قبل ما ندوزو لأولا، خاصك توعا أنهُ فلافاك غادي تاخُد معرفة.
و لكن ما عمرك غادي تاخُد منها القدرة على استخدام المعرفة و التوظيف ديالها
فحل مشاكل السوق، باش تاخد هاد المهارة، خاصك تشبع سطاجات، و تنزل
للتيران تتعلم بالمزيان.
إيوا هاك مثال باش تفهم مزيان :
فاطمة و خديجة بجوجهوم قراو على الماغكوتينغ، و لكن ملي تخرجو
فاطمة نجحات، و خديجة والو ما دارت.
علاش ؟
لأن فاطمة كانت كا تعاون باباها فالمحل التجاري ديالو و اكتاسبات مهارة
إقناع الزبائن بالشراء، لأنها سطاجات مع باباها ملي كانت صغيرة
و تعلمات تبيع و تشري و تهضر و تقنع المُشتري.
عكس خديجة لي كانت فقط كا تعتامد غير على المعرفة النظرية، و ما عمرها تعلمات كيفاش توظف ديك المعرفة.
إيوا أرانا دابا ندوزو ل
1- العامل النفسي :
الحقيقة لي قليل من الناس عايق و فايق بيها هي أننا كائنات #عاطفية، بمعنى أن النفسية ديالنا تقدر تلاعب بينا، سواء كثرة الفرحة لي كا تصيب ب #الغُُرور، أو كثرة الحُزن لي كا تصيب باليأس و القُنوط و الرجوع #لُور .
كيفاش نحافض على النفسية ديالي تكون سليمة ؟
أولا : فكر فداكشي لي #عندك، ما تفكرش فداكشي لي #خصك، باستغلالك لداكشي لي عندك، داكشي لي خصك غا يجي بوحدو.
نزيد نوضح، الأغلبية ديال الطلبة و التلاميذ كا يفكرو غير فالنُقط و الفاليداسيون، كا تلقا لسان حالهوم كا يقُول : خاصني نفاليدي، خاصني نجيب نقطة واعرة ....
ما تقولش خاصني نجيب نقطة واعرة ( لي خصك)، و لكن قول خدم باش تجيبها ( لي عندك) نتا لي بيديك هو تخدم، و النتيجة ما غا تكدبش.
جاست دير خدمتك و تقنها على أكمل وجه، كا نواعدك أن النقطة الواعرة غادي تجي بوحدها.
2- ركز على الأسباب و فقط، و ما تتسوقش للنتائج، دير كيما كان يدير
كان كا يبريباري للإمتحانات، و كا يقول لهلا يفاليدي بوهوم دوك الموديلات.
فاينبرت كان كا يفرغ الطاقة ديالو كولها فالخدمة، و ما كا يبقاش ليه الوقت باش يسول راسو، واش غا نجح ولا لا، أو يبدا يفكر فالموستقبال، فاينبرت كان مآمن أن المُستقبل كا يتصنع بداكشي لي كا يدير، ماشي بداكشي لي ناوي يدير، أو لي غادي يدير.
3- حضي راسك آش كا تخشي فكرشك.
للأسف الأغلبية فينا كا ياكلو لي جاب الله، كا تلقاه كا يدخل الماكلة لكرشو بلا سيليكسيون، بلا أونتروتيان ... ما كاين غير كور و عطي للعور.
كا تلقاه كا يضرب الفريت و أخواتها من العفاريت، و يكتر من السكار و الزيت، و فالتالي يقوليك، كا نبغي نقرا كا يغلبني النعاس، سي نورمال أ ولد الناس. لأنك كا تاكل بلا عقل و بلا قياس.
ديما كا نقول حضيو راسكوم آش كا تاكلو، راه الماكلة عندها دور كبير، إذا ما غديتيش الجسد ديالك بطريقة صحية، راه دماغك ما غاديش يفونكسيوني مزيان.
ما غا نقولكش شنو خاصك تاكُل، ولكن غا نقوليك بعد على :
( 1- الماكلة دالزنقة و أخواتها من الوجبات السريعة.
2- بعد على الكاشير و مولفوي و الحلويات و نقص من السم الأبيض (السكر)
ما فيها باس نقوليك : كتر من الخُضر و الفواكه و الروز و أي أُكلة صحية مُعترف بها طبيعية. )
4- كترو من شُرب الماء، راه إلى جيت نهضر على الفوائد ديال الماء ما غا نساليش، و غير الماء بوحدو خاصو آرتيكل بوحدو، خاصة و أنهُ فالبرد ما كا يجيناش العطش، و كا نرتاكبو جريمة فحق الصحة ديالنا، بحيث ما كا نشربوش الما بزاف.
راه خاصك تكتاسب عادة، ما كرهتش من هاد اللحظة ديما قرعة ديال الما تكون حداك، منها تشرب بزاف، و تبدا تنوض الطواليط (بيت الراحة) ديفولا مع راسك و تهرس #الروتين و يطيحو عليك الأفكار #العظيمة ، مالك كا ضحكي أ #كريمة 😂
رابعا : حضي راسك آش كا تخشي فوْدنيك.
( فحالة كانت المناعة النفسية ديالك ضعيفة )
لي كا نقصد بيها هو بعد على أي موسيقى حزينة كا تزيد تكمل عليك، و بعد على صحابك لي فيهوم كترة الشكاوي و البكا و لعب دور الضحية.
باختصار : بعد على الناس #السلبيين لي كا يفشو ليك الروايض، و يقولو ليك باراكا من القراية راه كترة القراية كا تحمق، أصلا طفروه هادوك لي قراو ....
بعد على هاد #الأوباش و هرب منهوم هُروبك من الأسد، واخا تعرف دير القطن فودنيك، راه الإحباط مرض مُعدي، و حضي راسك لا تعدى.
خامسا : ملي تكون كا تقرا و تعيا تفكر الإبتسامة ديال إنسان عزيز على قلبك، و تفكر الفرحة ديالو بيك ملي تنجح.
6- شوف بعيد، ما تكونش محدود الرؤية، من اللخر، واليديكوم ما بغاوكومش تنجحو، من اللخر بغاوكوم توضفو مع الدولة و توليو تا نتوما ضربو المانضة فراس الشهر، ماشي طمعا فيكوم أو ففلوسكوم، و لكن بغاو يطمائنو عليكوم و بغاوكوم تأمنو مُستقبالكُم.
هادشي بطبيعة الحال لي عينيهوم فالدولة، أما لي باغي يكون حُر و شاف ديال راسو، فراه كا نتعجب ليه شنو كا يدير هنا و هو قاري فالعُنوان :
" كيفاش تمشي مزيان فلافاك ؟ " سير أ خويا هاد لارتيكل ماشي ليك، سير تبع شي كورس فيوديمي أو ليندا خير ليك.
7- كاينة آية فالقُرآن كا تسالي معايا و لي هي :
" أَنْ لَيْسَ لِلْإِنْسَانِ إِلَّا مَا سَعَى (39) وَأَنَّ سَعْيَهُ سَوْفَ يُرَى "
إذا كنتي فعلا باغي توصل، غادي تلقا أي طريقة، أي وسيلة.
8- العلاقات العاطفية ( وهدي هضرت عليه فآرتيكل التبويقة الغرامية)
9-الأحلام الإباحية ( وهدي تا هي هضرت عليه فمقال سابق )
10- فن عدم التسواق للنتائج.
من خلال التجربة ديالي كطالب و كأُستاذ لطلبة الجامعة لاحضت أن الطلبة المتفوقين
غير متسوقين، لا للباشار، و لا لهضرتهوم، و لا للنتائج.
كا يقراو بنيتهوم، و بكل جدية و تفاني، صدقات كا يفرحو، ما صدقاتش
ما كا يتسوقوش، لأنهُوم واعيا أن البكا و الشكا ماعمرو غا يحل المشكل، قد ما غا يزيد يعقدو.
11-النعاس ( خاصني نكتب عليه موضوع بوحدو )
أهم من الماكلة و الرياضة، ضروري خاصك تشبع نعاس، وحتى القيلولة غا تساعدك بشكل كبير فقوة التركيز و تقوية الذاكرة. و لذلك خاصك ضروري يوميا ( ثمان ساعات من النوم)
و حتى إذا كنتي من عشاق الليل ضروري خاصك تعوض نعاسك بالنهار.
12- قوة التركيز ( هضرت عليها ففيديو سابق )
13-تنظيم الوقت ( حتى هو دويت عليه ففيديو سابق )
14- الأهم قبل المُهم
و هادي تعلمتها من الكاتب ستيفن كوفي، فلافاك الأهم هو داكشي لي غا تمتاحن فيه.
و المُهم هو ديك الثقافة و التفاصيل لي ما غا تمتاحنش فيهوم.
فالأغلبية فلافاك ما كاينجحوش لي أنهُوم كا ييبغيو يفهمو كولشي.
فلافاك ما يمكنش تفهم كولشي، فلافاك يمكن ليك فقط تفهم غير داكشي لي غا تمتاحن فيه.
و بالتالي خاصك تتعلم ما ضيعش الطاقة ديالك خارج أرضية الملعب.
فالعطلة عاد تفرغ لداك الفضول العلمي و المعرفي لي عندك، أما ما حدك فلافاك، فتعلم
تكون من النوع لي كا يقُول : سمعنا و أطعنا.
لي أن أغلبية الأساتذة كا تلقاهوم من نوع بضاعتُنا ردت إلينا.
كيفاش نعرف الأهم ؟
الجواب : الحضور، من خلال شرح الأستاذ شوف شنو هوما الفقرات لي كا يشرحهوم
باعتزاز و هو كا يفرنس، و كا يعاودهوم بزاف، و كا يبغي كولشي يكون مركز معاه.
ثاني طريقة هي : الإمتحانات السابقة، منها كا تتعرف على عقلية الأستاذ كي دايرة، شنو كا يبغي و شنو ما كا يبغيش.
15- هانتا طبقتي كامل و ها نتا حصلتي على الإجازة بميزة حسن، لا يعني
أنك غا تلقا المُستقبل مفروش بالورود، ضروري خاصك تعنا ليا بالسوفت سكيلز
Soft skills
لي خاصني ندير عليها آرتيكل بوحدها تا هي.
ضروي خاصك تكون مطلوق فاللغة الفرنسية لي هي لغة سوق الشغل بالمغرب.
و الإنجليزية لي هي علاقة سوق الشغل فالعلاقات الخارجية، و لغة التعلم.
لي بها غادي تتعلم بزاف ديال الحوايج لي غا يخليوك متميز على فرانشاوا.
أزال المؤلف هذا التعليق.
ردحذف